ريق الجمر ..مصطفى العبريدي

كان عليا انعزي شرجم القلب
باش ما تزند جمرات المحنة
صاط عليها ريح الولف
ربيع البوح..اخرف
و بين سطور الكلام ..اتلف العرف.

ابقيت في راسي ملي تقت
و الثقة ورقة اهشيشة..ريشة
تقدر تلعب بيها شلا نزوات
و فوق ورقة السكات..اتنقز السطر
و في قلب رحبة المرگد..اتلف الوكر
اتفرك اجناحاتها..و اتطير
بلا ما اتشاور..اتسافر..گوادها  گانة الهوا (ء)
حيت الهوا (ء) ضاسر..من افعايلو كافر
يقدر ايزاگل مگانة العمر
و على دخان هنبة امهيلة
في ليلة اهبيلة
يطلع إيزار الضباب
منشور على لحاف السما(ء)
ايشوش على عين الگمرة
اللي والفات..
اتطل من حايك هاد الكون.

كان عليا انسوك فم العطفة
انبيض اسنان الراگد
و بالحرگوص..انرطب خدود الحال
حيت الحال موال..كلامو تسوال
ناض اتصاحب مع گانة الفال
اتحاماو عليا..سرجو خيول الشجية
اتصافو في محرك التنهيدة
و ركبو اهبال التبراع..

اتحرك الخاتر في القاع
طلعات فرارة..مسرارة
غطات شوارب كاس الكتبة
حركات فيا نشبة
اتناوبات فيها الحروف
على شكون يفتح الرحبة
ايشالي بالمعاني في جدبة..عزبة
امحصنة في برج التيقار ما اترافق جار
باش ما يترمى عليها عار
اتراعي جورة سيف الوقت.

كان عليا انسافر فيا
انريس فلوكة تحناني
و عاوتاني..نمشي ثاني
انحرك مقادف لوناسة
لمرصعة بجوهر الوفا(ء)
انشق الأمواج
طامع نلقى خيط الصفا(ء)
اللي رشاه صهد شمس الوسواس
حيت الوسواس كاس..ما ليه قياس..عيبو عساس
على شهوة..على سهوة
مرسومة سراب في طريق الرزانة.

الريح..قالو لارية..اتگلب أمواج الذات
الماء..قالو مارية..اتساوي لسان لغوات.
ويلا اكتاب..و كان السباب..و اعمات عين الصواب
من مداد حلمة..يتكتب زواج الحكمة
بين الريح و الماء
يتولد رماد الشتا(ء)
ايهيج موج بحر التجوال
ايفيق عين السروية
المحجوبة بحواجب حجاية حجاب المعنى.

ويلا كان..و والا بد تختار
بين شيطان الحيرة..اللي ايحفي شوكة الصبر
و حكمة عين العقل..اللي اتصفي امراية النظر
ما فيها باس
إيلا اتمعنتي حالة النار
منين تگدي في اسوالف القلب
حيت لسان النار..ثأر..غدار
إيلا اخرج من عمارة بارود
مرشوش بريق الجمر
ايواگض المنسي في كانون العمر
و اللسان بلا ريق..طريق بلا رفيق
كي دات كي جابت
تبقى ديما اتقلب على حلاوة العشرة
ويلا كانت ليقامة افطيرة..
قفلة بلا تفويرة..
اشهيوة ناقصة دغميرة..
سفينة بلا قبطان..
تايهة في بحر التيهان..
امتلفة موري المكان
ما حاسة بحر امضاوة سيف الزمان
المحطوط على رقبة اللسان
كيف يمكن لك اتفوح..
ولا اتبورد على ملوك الميزان..!!!

                                   
         شتنبر 2018