إيمان الونطدي:شكون الشاهد فينا مللي تفيق الحلمه
إيمان الونطدي
1″محال تصدق الحلمه”
هاذ لكلام اللي سبقني ليك
وْشْمُوه الجدود بكف مرا عزبه
حالفه ما تخلط سبولا
و لا تطيح ميزان
هاد الكلام سلسلتو
بقصيده هاتره
الزمان عبار
مره زاهر مره نار
العمر خرافه
سطروها اللواله
وصدقوها التواله
هذا زهري رمى بياضو
زاوك ف الليل يقرب الوعده
الݣمره دلات جفونها
غابت ف المحال ….
محال تصدق الحلمه
2 “شكون الشاهد فينا و فينا”
جات القصيده مسرسبه
عرات الحروف
نزل المعنى تنكيس
شكون الشاهد فينا و فينا؟
على ذيك الرسام المايله
على ذاك الكلام المحبوك
على وعود ذاك المجذوب
على حنة العزبه المخضبه الكفوف
شكون الشاهد فينا و فينا ؟
على ذوك اللي ݣالو فينا
على ذاك الزمان المغشوش
على ولادنا اللي ما ولدناش
على ذاك الليل اللي فاق
لقانا سالينا و حنا مازال ما بدينا
